LEGAZPI CITY-Ipapadagos kan Department of Education Bicol an Palarong Bicol ngonian na taong 2026 sa Legazpi City mantang padagos an pagpapahiling nin aktibidad kan Bulkang Mayon.
Segun kay Deped Bicol Regional Sports Officer Francisco Dexter Sison, sa intrevista kan Bombo Radyo Legazpi na nagkakaigwa na sinda nin inisyal na paghahanda asin ipapadagos an Palaro ngonian na taon.
Nagkokondusir na man sinda nin miting kaibanan an mga opisyales manungod sa preparasyon kan nasabing aktibidad.
Kabale sa mga pinagolayan ninda an posibleng venue asin mga gagamiton na equipment.
Enkaso suboot na maglala an sitwasyon kan Bulkan sa panahon kan aktibidad, magamit sinda nin alternatibong eskwelahan sa southern na parte kan ciudad.
Kaiba sa saindang Plan B an paggamit sa mga elementary asin secondary schools kan Banquerohan, Matnog, Bariis, Humapon bilang mga option.
Tinawan doon man ni Sison na dai ipapa-postpone ang Palarong Bicol huli sa magigin maluya an tsansa kan provincia na makapagpadara nin mga atleta sa Palarong Pambansa.
Piglalaoman kan opisyal an nasa 10,000 hasta 12, 000 na maatendir ngonian na taon huli sa mga panibagong kategorya sa sports siring kan football elementary girls kun sain may 18 players.
Taunan man na pigsasagibo an Palarong Bicol sa ciudad kan Legazpi tuyong enot na aldaw sagkod ika-7 sa bulan nin Marso.
