LEGAZPI CITY- Padagos na pigsasapinal kan Philippine Fiber Industry Development Authority an hewas kan epekto kan bagyong Kristine sa industriya kan abaca sa provincia kan Catanduanes.
Segun ki Catanduanes Provincial Fiber Officer Bert Lusuegro sa intrevista kan Bombo Radyo Legazpi na dakol na mga lugar pa an dae nalalaog huli sa nairehistro na mga landslide.
Dakol na mga technicians man an dae pa nakakapaglibot sa island province huli sa pagsuspinder sa trabaho.
Basado sa inisyal na datos na kapot kan ahensya, nahiling na an banwaan kan Virac an saro sa mga nakapagrehistro nin dakulang danyos pag-abot sa mga pananom na abaca.
Paliwanag pa kan opisyal na dae pa makapag koordinar an ahensya sa mga opisyal kan Department of Agriculture sa lambang banwaan huli ta padifisilan pa an linya kan komunikasyon.
Mientras tanto, naglalaom si Lusuegro na matatapos na an pagkuwa kan datos sa masunod na semana ngani na maisapinal man an mga reports asin mapuunan na an isasagibong rehabilitation program.
Sinierto man kan opisyal sa mga abacaleros an ipapaabot na tabang kaya nangapudan ini na dae mawaran nin paglaom an sa pagtatanom kan nasabing produkto.
