Sinierto ni Agriculture Secretary Francisco Tiu Laurel Jr. na nagtetenir na pusog an suplay kan bagas sa nacion sa ibong kan paglangkaw kan presyo kan langis asin gastos sa agrikultura.
An posibleng 20% na pagbaba sa produksyon kan paroy an ipigkokunsiderar sanang “worst-case scenario,” asin dae pinaglalaoman na mangyayari huli sa lakdang na ipigpapaotob kan gobierno.
Dugang pa kan opisyal na nakikinabang an Pilipinas sa bastante na global rice supply, urog na hali sa mga pangenot na exporters siring kan India asin Vietnam na presenteng nasa peak kan harvest season.
Sa presente haros pano suboot an mga tambakan kan National Food Authority (NFA), na nagsisirbing buffer stock kan nacion.
Nagtagama man an DA nin P10 billion assistance package para sa mga paraoma asin parasisira, kaibanan an fuel subsidies asin iba pang targeted interventions, na may prayoridad sa produksyon kan bagas.
Preparado man an gobierno na magdugang nin hasta sa P20 billion para sa farm inputs asin P10 billion para sa pagtabang sa mga parasisira ngani na mamantenir an saindang kabuhayan.
