LEGAZPI CITY — Mag-aabot nin magkakanigong tabang an pamahalaang lokal kan Tabaco City sa Albay para sa nawalat na pamilya kan umboy na nagadan sa laog kan Mayon evacuation center.
Magigirumduman na maagahon kan Sabado kan madiskubre kan ina kan 1 year and 8 months old na umbot na wara na ining buhay na pigtutubudang igwang koneksyon sa pigmamateng helang na pneumonia.
Sa intrevista kan Bombo Radyo Legazpi ki CDRRMO head Hugo Buen, ikinamundo suboot an pangyayari asin nagpa-abot man nin pakikidumamay sa pamilya kan umboy.
Aminado man si Buen na nagkapira sa mga Mayon evacuees an nagkakahelang, kadaklan an mga kaakian na komon na pigtatamaan kan abo, sipon asin kalintura na ipigtatakod sa malipot na panahon asin suksukan na evacuation centers.
Katakod kaini, dagos-dagos man an pagbabariwas nin bulong mantang naka-standby man an ambulansya para sa mga evacuees na nangangaipo kan atensyon sa ospital.
Bastante man suboot an mga relief goods hale sa Department of Social Welfare and Development (DSWD) asin pribadong organisasyon kun saen namudmod an duwang ten-wheeler trucks nin suplay para sa apat na aldaw kaitong nakaagong Sabado.
Nasa 1, 898 na pamilya o kabilugan na 7, 535 indibidwal an nagtetenir ngonian sa temporary shelters kan Tabaco City huli sa nagpapadagos na aktibidad kan bulkan.
