LEGAZPI CITY—Posibleng iimplementar na an ASEAN-inspired attire sa mga empleyado kan gobyerno sa kapitolyo kan Albay ngunyan na papaabuton na Marso.
Segun ki Albay Acting Governor Baby Glenda Ong Bongao sa intrevista kan Bombo Radyo Legazpi, an nasambitang dress code susog sa ipinaluwas na guidelines gikan sa gobyerno-nasyunal na kun saen sa kada primerong aldaw nin Lunes kan kada bulan kaipuhan may sulot an mga empleyado kan gobyerno nin sarong ASEAN-inspired attire.
Sinabi kan opisyal na dae kairiba sa nasambit na dress code an mga nasa job order.
En kaso man na may dae magsunod sa dress code na ipigpaotob posibleng sindang ipaapod sa human resources.
Dugang kaini na pag aldaw nin Martes sagkod Miyerkules pwedesir nang isulot kan mga empleyado an dati nang uniporme kan kapitolyo, pag aldaw nin Huwebes iyo an kanya-kanyang uniporme kan kada departamento o opisina, mantang pag-abot nin Biyernes iyo man an pig-aapod na ‘wash day.’
