LEGAZPI CITY – Nagsagibo na nin imbestigasyon an Gobierno Provincial mapadapit sa mga serye nin pagbabaha sa Barangay Masarawag, banwaan kan Guinobatan sa provincia kan Albay.
Segun ki Governor Noel Rosal sa intrevista kan Bombo Radyo Legazpi na nagduman an sarong grupo sa nasabing barangay arug kan Albay Provincial Public Safety and Emergency Management Office (APSEMO), Guinobatan Municipal Environment and Natural Resources Office (MENRO), asin Provincial Engineers Office nganing magkaigwa nin coordinated investigation sa pigsasabi kan nagkapira na huli sa quarry asin iba pang katakod na aktibidad an nasa likod kan pagbabaha
Alagad minaluwas inisyal na imbestigasyon na nagkaigwa nin tipak o crack sa mga dapat na pig-aagihan kan tubig kun kaya nagkaigwa nin bagong agihan an tubig na nagkawsa man kan mga nangyaring pagbaha sa nasabing barangay.
Pighahalat niya ngonian an resulta kan imbestigasyon nganing tulos na magibuhan nin remedyo nganing mag-agi sa mga bulos kan tubig sa tamang agihan asin an posibleng pagsagibo nin desilting kun kinakaipuhan.
Punto man kan opisyal na haloy na palan na namamatean kan residente an mga serye kan pagbabaha alagad dae natatawan nin aksyon kun kaya promesa niya na enkaso igwang makuwang pondo an tulos ninda tatawan nin remedyo ngonian na panahon nin emerhensya.
Pagdoon niya man na igwang mga flood control projects sa Barangay Masarawag alagad sa mga nangyaring pagbaha an bako man sa sapa nag-agi an tubig kundi sa mismong mga tinampo nagbulos.
Dae niya man pighahale an posibilidad na may kasabay na mga lahar deposits an mga baha na nangyayari sa nasabing barangay kun kaya dapat suboot na ma-imbestigaran ini nganing dae na mautro an mga kaparehong insidente.
Pighayag pa ni Governor Rosal na nagsususpendi sana niya nin face to face classes bilang preventive meassure nganing maisalbar an buhay asin salud kan mga estudyante enkasong kumusog an pag-uuran sa provincia.
