LEGAZPI CITY—Matrayumpong naikundusir kan mga kapulisan an Albay Security Summit sa sarong mall sa Legazpi City.
Segun ki Albay Police Provincial Office Spokesperson Police Major Kharren Formales, sa intrevista kan Bombo Radyo Legazpi, saro ining inisyatibo kan saindang opisina asin suportado kan Police Regional Office 5.
Inatendiran ini kan nasa 124 na mga partisipantes kaiba na an mga store asin mall owners, managers, security officers asin mga hepe kan kada police station sa provincia.
Afuera sa ginibong briefing asin lecture, saro sa nagin highlight kan aktibidad an pagpirma kan gabos na nasabing partisipantes sa pledge of commitment, kun sain digdi nakabugtak an dedikasyon kan kada saro nganing magtarabanagan na mamantinir an paz y orden, seguridad, asin kaligtasan bako sana sa mga pampublikong lugar kundi magin sa mga establishimiento.
Mientrastanto, pangapudan kan opisyal sa publiko na en kaso makahiling nin anumang insidente an tulos ining ipaabot sa kapulisan nganing marespondehan.
