LEGAZPI CITY—Timbog an sarong paratienda nin sira sa ginibong buy-bust operation sa Barangay It-Ba sa banwaan kan Manito, Albay.
Binisto an suspek na si alyas “Vert”, 31-anyos asin residente kan Barangay Pawa kan nasabing banwaan.
Nakumpiskar digdi an tulong gramos nin pigtutubudang shabu na may estimated value na P20,400.
Kinundusir an operasyon kan Manito Municipal Police Station, Albay Police Provincial Office Provincial Intelligence Unit asin 2nd Provincial Mobile Force Company, Philippine Drug Enforcement Agency Albay Provincial Office magin kan PDEA Regional Office 5.
Dinara an suspek asin nakumpiskar na mga ebidensya sa Manito MPS para sa magkakanigong disposisyon asin dokumentasyon.
Mientrastanto, mahahampang an nasabing persoan sa pagbalgar sa Republic Act No. 9165 o Comprehensive Dangerous Drugs Act of 2002.
