LEGAZPI CITY- Pinawi kan mga otoridad an pagkahadit kan publiko makalihis na mapadpad an sarong gadan na megamouth shark sa baybayon kan Caramoran, Catanduanes.
Segun ki Bureau of Fisheries and Aquatic Resources Bicol Spokesperson Rowena Briones sa intrevisa kan Bombo Radyo Legazpi na may sukol ining 5.5 meters.
Sinabi kan opisyal na warang anuman na koneksyon sa sakuna o trahedya an pagkaka padpad kan nasabing marine animal sa baybayon, kontraryo sa pagtubod kan nagkapirang mga residente.
Napag-araman na an mega mouth shark an sarong rare na klase nin pating kaya bibihira ining magkaigwa nin sightings.
Bako man ini komon na napapadpad sa hibabaw na parte kan kadagatan huli ta nagtetenir an nasabing sira sa hirarom na parte kan dagat.
Pighihiling kan ahensya na posibleng rason kaya napadpad sa hibabaw na parte kan kadagatan an nasabing megamouth shark huli sa pagbabago sa temperatura kan panahon, ukol kan kadagatan o posibilidad na may helang o injury an nasabing hayop.
Mientras tanto, nagpagirumdom man si Briones na kun igwang kaparehong mga stranding incidents, kinakaipuhan na ibitaran kan mga tawo na magrani o magpapot sa mga stranded marine animal kun bako man trained an mga ini huli ta posible pang magkawsa nin stress sa hayop.
Mas marhay suboot na makipag koordinar na sana sa mga otoridad ngani na matawan nin marikas na atensyon.
