Ibinasura kan Court of Appeals (CA) an apela ni dating Bamban, Tarlac Mayor Alice Guo na makaluwas nin karsel makalihis iduon na iligal an nagin pag-arestar saiya kan Bureau of Immigration (BI).
Sa pitong pahinang desisyon kan First Division kan Court of Appeals, pinalagan kan korte an argumento ni Guo asin nilinaw an katotohan na bako an Bureau of Immigration an nagpapatenir saiya sa kulungan.
Segun sa appellate court, nakakulong si Guo basado sa joint decision na ipinataw kan Pasig City Regional Trial Court Branch 167 huli sa kasong qualified human trafficking asin bako huli sa anuman na warrant hali sa BI.
Dugang pa kan korte na warang anumang ebidensya o bastanteng basehan na nagpapahiling na nabayolar kan saiyang pagkakakulong an diretsos na pangkonstitusyon sa marikas na paglilitis asin kalayaan.
