LEGAZPI CITY- Bako pa man suboot labing makakapektar sa sektor kan agrikultura an paglaog kan “weak El Niño”, nagpagirumdom na an PAGASA sa Department of Agriculture (DA) na magsirbe na ining paghahanda tangarig na dae na maray madestroso an produksyon.
Pag-eksplikar ni PAGASA Deputy Administrator for Operations and Services Dr. Landrico Dalida Jr. sa intrevista kan Bombo Radyo Legazpi puon pa kaitong nakaaging taon an monitoring na ginibo makalihis na mapag-araman an pag-init kan temperatura sa sirangang parte kan Dagat Pasipiko.
Namantenir an pag-init kan sea surface temperature kaya laoman na suboot an hibabang bagsak kan uran sa nagkapirang parte kan nacion, kaibanan na an anom na provincia sa Bicol puon sa Marso hasta Mayo.
Segun ki Dalida, nasa 41% hasta 80% an piglalaomang mababawas sa bagsak kan uran.
Katakod kaini, kaipuhan suboot na pakusugon an kampanya sa pagtitipid nin tubig mantang bukas man an PAGASA na magtabang sa mga cloudseeding operations para sa irigasyon kan mga oma.
Segun pa ki Dalida na susog sa forecast kan PAGASA, mas matindi an magigin pangangaipo sa uran sa Regions 1, 2 asin Cordillera Administrative Region (CAR), magin sa nagkapirang parte kan National Capital Region na nasa way below normal.
Mientras tanto, abiso pa kan weather bureau na laoman na man an power supply interruption urog na sa mga lugar na nagkukua nin elektrisidad sa hydrological systems.
Sa ibong na lado, posibleng magrahay an rainfall sa Bicol afuera sa Masbate sa pag-iral kan Hanging Habagat sa Hunyo hasta Agosto.
