LEGAZPI CITY- Naglunsar na nin imbestigasyon asin nakaalerto na an PNP kasunod kan pangagagadan sa tolong lalaki na pigsasabing nakidnap kan mga pigtutubudang New People’s Army antes na madiskobreng wara na nin buhay sa banwaan nin Palanas sa Masbate.
Segun sa Masbate Police Provincial Office, kasuodma bandang alas 7:00 nin aga kan sapiritan na darahon kan nasa 30 armadong NPA an mga biktimang sinda Jose Lalaguna, 51 anyos; Jestoni Lalaguna, 22 anyos, asin Joey Lalaguna.
Base sa testimonya kan mga nakahiling sa insidente, lunad nin motorsiklo an mga biktima asin naglalako nin speaker, floor mat asin salming sa Barangay Miabas kan mag-abot an mga NPA na tulos na binugkos an mga ini asin dinara paparayo sa lugar.
Alagad bandang alas 4:00 nin hapon kan kaparehong aldaw kan madiskobre an bangkay ninda Jose asin Jestoni na wara na nin buhay sa Barangay Piña.
Alas 4:30 man nin maagahon ngunyan na aldaw kan madiskobre an bangkay kan saro pang biktima na si Joey Lalaguna sa Barangay Asid.
Huli sa insidente, naglunsar na an PNP nin operasyon nganing mahanap an mga suspek na responsable sa insidente, mantang mas pinahigot pa an seguridad sa lugar.
Bako pa man na malinaw hasta sa ngunyan kung ano an posibleng rason kan pagkidnap asin paggadan kan mga pigtutubudang NPA sa tolong biktima.
