LEGAZPI CITY—Nagresulta sa pagkakabuwag kan sarong drug den asin pagkakaarestar kan apat na indbidwal an ginibong buy-bust operation kan mga otoridad sa Purok Nipa, Barangay Malinta, Masbate City.
Binisto an mga suspek na sinda alyas “Meynard,” nasa legal na edad, lalaki, pigtutukdong maintainer kan drug den; alyas “Reymart” nasa legal na edad, lalaki; alyas “Edna” nasa legal na edad, babae; asin alyas “Jaymar” nasa legal na edad, lalaki asin pararehong residente kan nasabing ciudad.
Ginibo an operasyon kan Philippine Drug Enforcement Agency Masbate, Masbate City Police Station City Drug Enforcement Unit, PNP Drug Enforcement Group, asin Provincial Drug Enforcement Unit kun sain nadakop an mga suspek sa aktong pagpapabakal asin paggamit nin ipigbabawal na droga.
Nakumpiskar sa saindang posesyon an pocomas o menos walong gramo nin pigtutubudang shabu na may kantidad na labi P54,400, kabale an buy-bust money, asin mga drug paraphernalia siring kan improvised tooter, lighter, aluminum foil, gunting, asin mga coin purse.
Mahahampang an mga nasabing suspek sa pagbalgar sa Sections 5, 6, 7, 11, 12, 15, Article II of Republic Act 9165, o Comprehensive Dangerous Drugs Act of 2002.
