LEGAZPI CITY—Mawot kan Bureau of Fire Protection Masbate na isagibo an holistic approach sa panahon kan El Niño.
Segun ki Bureau of Fire Masbate Public Information Officer Fire Officer 1 Reden Invento, sa intrevista kan Bombo Radyo Legazpi, mawot ninda na may piggibo antes, durante, asin pakatapos kan El Niño.
Saro sa saindang lakdang an pagpapakusog kan fire prevention campaign kun sain posibleng maglangkaw an insidente nin kasulo huli sa kadakol man liwat an naggagamit nin kuryente asin mara an palibot—na madaling matumpos nin kalayo.
Siring man an pagkundusir nin assessment kun saen aaramon an mga lugar na igwa asin water sources; pag-aram an mga high-risk areas asin bubugtakan nin naka-standby na fire truck asin personahes.
Pakikipagkoordinar sa mga local government units para sa posibleng augmentation kan saindang mga personahes para sa nangangaipuhan nin tabang, magin an pagpapahigot kan training and drills huli sa posibleng paglangkaw kan insidente nin kasulo.
Afuera digdi, durante kan Niño an pagsasagibo nin mahigot na fire monitoring huli sa paglangkaw nin insidente kan grass fire, forest fire asin iba pa durante kan El Niño.
Makalihis an El Niño an pagkundusir nin educational response urog na sa pag-edukar sa mga namamanwaan kun ano an dapat na gibohon nganing makalikay sa kasulo, magin an pagrepaso sa mga ginibo ninda durante kan El Niño nganing maaraman kun ano an ginibong tama asin sala nganing aram na sa masunod an saindang gigibohon.
