Pigkakarkulong 54 na rehiyon asin probinsya sa Pilipinas an pwedesir mahamapang sa matinding krisis sa tubig asin tagmara sa pag-ultanan kan katapusan kan 2026 asin mga enot na bulan kan 2027.
Susog sa El Niño Snapshot na ipinaluwas kan United Nations Office for the Coordination of Humanitarian Affairs (UNOCHA), an mga rehiyon kan Bikol asin Eastern Visayas an piglalaoman na enot na makakamati nin tagmara, antes pa man mag-abot sa Luzon, MIMAROPA, asin Metro Manila sa Enero 2027.
Pag-abot man kan Marso, piglalaoman na bilog na mamamatian an epekto kaini sa iba pang parte kan nacion, partikularmente sa Western Visayas, Central Visayas, asin sa bilog na isla kan Mindanao.
An mga eksperto nagpatanid na an siring na klase nin klima pwedesir magkawsa nin dakulang danyos sa mga pananom, kakulangan nin supply nin tubig sa mga harong, paglangkaw kan presyo sa mga paninda sa merkado, asin paglakop nin mga helang na konektado sa init.
Kabali sa mga pangenot na lakdang kan gobyerno tanganing masimbagan an krisis iyo an alokasyon na $123.2 milyon para sa pagresponde sa kalamidad, kasabay kan deklarasyon nin “state of calamity” sa 109 na lokalidad tanganing tabangan an pigkakarkulong 4.6 milyon na mga obrero sa sektor nin agrikultura asin pagsisira.
