LEGAZPI CITY – Nasakyada kan Philippine Drug Enforcement Agency (PDEA) an sarong drug den sa Legazpi City makalihis an matrayumpong buy-bust operation.

Segun ki PDEA Regional Office 5 spokesperson Carlo Fernandez III, sa intrevista kan Bombo Radyo, nangyari an operasyon alas 9 nin banggi kan Nobyembre 19 sa Purok 3, Barangay 33, Peñaranda, Legazpi City.

Naarestar sa parehong lugar sinda alyas “Lito”, na drug den operator, kaiba sinda alyas “Jonah” asin alyas “Shane”.

Nasamsam sainda an 11.78 gramo nin shabu na igwang pigkakarkulong standard value na P80,104.

Pigkondusir an operasyon kan PDEA RO5 Regional Special Enforcement Team 2, na sinuportaran kan Team 1, PDEA Albay asin PDEA Sorsogon.

Nahahampang an mga suspek sa kasong pagpabakal nin droga, pagmantenir nin drug den, pagkapot nin ilegal na droga asin paraphernalia, sa irarom kan Republic Act 9165.