LEGAZPI CITY-Tulong indibidwal an naarestar sa ginibong buy-bust operation kontra sa iligal na droga sa Daraga, Albay, resulta kan epektibong koordinasyon asin kooperasyon kan manlaen-laen na law enforcement agencies sa Bicol Region.
Kabali sa mga naarestar iyo an sarong indibidwal na bisto sa alyas na “Mac,” na pigkokonsiderar na drug den maintainer asin kabale sa mga pigkokonsiderar na high-value individuals (HVI). Kaiba man sa mga inarestar si alyas na “Raffy,” na sinasabing sarong empleyado nin drug den, asin si alyas na “George,” na parehong pigklasipikar bilang mga street-level individual (SLI).
Pinangenotan kan operasyon kan PDEA Albay Provincial Office (PDEA Albay PO), sa pakikipagtabangan kan PDEA Regional Office V Regional Special Enforcement Team I (PDEA ROV RSET I) asin RSET II, siring man an Daraga Municipal Police Station (Daraga MPS) asin Police Intel Police (PIU) kan Provincial Police asin an Coast Guard Intelligence Unit-Albay.
Durante kan operasyon, nakumpiskar an pitong (7) pidaso nin heat-sealed transparent plastic sachets na may laog nin pigtutubudang shabu, na may total na gabat na poco mas o menos 12 grams asin pigkakarkulong standard drug price na P81,600.
Padagos pa an imbentaryo asin dokumentasyon kan mga nakumpiskar na evidencia sa pinangyarihan kan operasyon.
Pigkokondusir ini sa presensya kan mga nadakop na suspechado asin kan mga kinakaipuhan na mandatory witnesses, susog sa mga umiiral na proseso asin kaukulang alituntunin sa pagkapot kan mga ebidensyang nakumpiska sa operasyon laban sa ilegal na droga.
