LEGAZPI CITY– Binuwag kan Philippine Drug Enforcement Agency (PDEA) Albay an sarong drug den sa Barangay Bogtong, Legazpi City sa isinagibong buy-bust operation kan nakaaging domingo.
Segun kay PDEA Albay Provincial Director Noe Briguel, sa intrevista kan Bombo Radyo Legazpi, haloy nang nasa watchlist kan Barangay Anti-Drug Abuse Council (BADAC) an target huli sa sunod-sunod na reklamo kan mga residente manungod sa iligal na droga.
Pirang buwan suboot nagsagibo nin case build-up asin surveillance an pinagsarong pwersa kan PDEA Special Enforcement Team, PDEA Interdiction Unit, PNP Legazpi, Provincial Drug Enforcement Unit, asin Coast Guard Intelligence antes ipigkasa an operasyon.
Pigkonsiderar na high-impact operation an nasabing raid makalihis na makumpiskar an pigkakarkulong P102,000 na kantidad nin iligal na droga asin nadakop an apat na indibidwal na gabos pigkonsiderar na high-value targets.
Segun ki Briguel, kadaklan sa mga suspek residente kan Barangay Bogtong, mantang an saro hale sa ibang barangay alagad naaktuhan sa laog kan drug den.
Nahahampang ngonian an mayor na suspechado sa kasong pagbalga kan RA 9165 na may penalidad na life imprisonment mantang an mga kaiba kaini nahahampang sa kasong pagbisita sa drug den.
Pigsierto kan PDEA na mas pakukusugon pa an kampanya kontra sa iligal na droga sa probinsya kan Albay.
