LEGAZPI CITY—Kalaboso an tulong indibidwal kabale an sarong 17-anyos na menor de edad sa ginibong buy-bust operation sa Barangay Tinago, Camalig, Albay.
Arestado sa nasabing operasyon an mga suspek na sinda alyas “Boy” asin “Rod”, parehong nasa legal na edad, bagong pangaran sa listahan kan mga Street Level Individual, asin residente kan kaparehong banwaan, magin an sarong menor de edad.
Basado sa report, matrayumpong nakabakal nin sarong pakete nin pigtutubudang shabu na may gabat na 0.13 gramo ang poseur buyer gikan sa mga suspek.
Sa body search, nakua hale sa posesyon asin kontrol ninda alyas “Boy” asin “Rod” an anom na pakete nin pigtutubudang shabu na may gabat na 44.09 na nagkakantidad nin P176,360, sarong aluminum foil strip asin apat pang bukas na transparent plastic sachets na gabos an may residue nin pigtutubudang shabu, buy-bust money, duwang lighters, aluminum foils, sling bag asin transparent sachet.
Nag-abot sa 44.22 gramo nin pigtutubudang shabu na may standard drug price na P330,696 an kabilogang nakua hale sa mga suspek.
Ginibo an operasyon kan Philippine Drug Enforcement Agency Regional Office V (lead unit), Albay Provincial Intelligence Unit, Camalig Municipal Police Station asin Coastguard Intelligence Unit.
Mientrastanto, itinurn-over sa Municipal Social Welfare Development Office an menor de edad na suspek para sa nararapat na disposisyon.
Mantang an duwang suspek an nasa kustodiya na kan mga otoridad para sa magkakanigong disposisyon.
