LEGAZPI CITY—Bilang parte kan kampanya na “Oplan Pagtugis” kan Criminal Investigation and Detection Group, naarestar an tulong miyembro kan Communist Terrorist Group na wanted sa paggadan sa sarong paratukdo sa provincia kan Masbate.
Segun ki Criminal Investigation and Detection Group Regional Field Unit 5 Regional Chief Police Colonel Oscar Regala Jr., sa intrevista kan Bombo Radyo Legazpi, binisto an mga suspek na sinda alyas “Abe,” “Rex,” asin “ “Noy,” na pigtutubudang miyembro kan teroristang grupo asin naghihiro sa nasabing provincia.
Naarestar an mga ini sa bisa kan warrant of arrest para sa kasong murder na inisyu kan November 20, 2025 asin warang pigrekomendang piyansa.
Nagluluwas sa imbestigasyon na kan Hulyo 9, 2010, pinagbabadil kan mga akusado an sarong 27-anyos na paratukdo mantang pauli na ini sa saindang residencia.
Dugang kan opisyal na sa ngunyan an may natatada pang mga miyembro an saindang pighahanap alagad papaluya na suboot an grupo kaini sa nasabing lugar.
Pig-asigurar man ni Regala na kun sisay man an may impormasyon na may kinaaraman sa wanted persons an tulos na ipagtaong aram sainda nganing tulos ining masolusyonan kan saindang operatiba.
