LEGAZPI CITY – Paramientras na dae naagihan an kakalsadahan na sakop kan Barangay Moning, banwaan nin Baras sa provincia kan Catanduanes makalihis an namateang mudslide.
Segun ki Baras Municipal Disaster Risk Reduction and Management Office Head Engr. Khalil Tapia sa intrevista kan Bombo Radyo Legazpi na nagin kawsa kan insidente an namateang warang patod na pag-uuran kasubanggi asin an pigsasagibo na farm to market road sa saindang lugar.
Natrap sa nasabing pagrasay nin dugi an maabot sa 20 behikulo asin kinaipuhan nin dagdag na tabang hale sa Dpertment of Public Works and Highways huli ta maski an saindang backhoe suboot an dae kinaya an debris na pigwalat.
Sa pagtatarabangan man an nagibo nindang buksan an one lane kan tinampo alagad kaipuhan an labing pag-iingat urog nang mahalnas para sa mga saradit na behikulo partikulamente an mga motorsiklo.
Pigtaram pa kan opisyal na nagin pahirapan an paglinig huli ta uminabot sa haros 1 meter an hibog kan dugi na pigsasabayan pa kan pagbulos nin mga tubig na resulta kan baradong kanal.
Sa kagayunan suboot an wara mang harong an naapektaran alagad dae ninda pighahale an posibilidad na may madamay urog nang piglalaoman na mas makusog pa an pag-uuran sa mga masunod na oras.
Ini suboot an primerong bes na may dugi na nagrasay sa mga kaharongan sa nasabing barangay alagad paglilinaw niya man na dati nang may nag-ooverflow na creek tuyong warang patod an pag-uuran.
Pangapodan ni Tapia sa publiko na maagi sa Barangay Moning na kaipuhan an labing pag-iingat huli sa mahalnas asin madugi na tinampo urog na ngonian na padagos an pag-uuran sa saindang banwaan.
