LEGAZPI CITY-Inanunsyo kan Civil Service Commission (CSC) na matao sinda nin Overseas Filipino Workers–Preference Rating (OFW-PR) sa mga kwalipikadong Overseas Filipino Workers (OFWs) bilang pagbisto sa saindang serbisyo asin sakripisyo.
Basado sa CSC Resolution No. 2600596, an mga OFW na makakakuha kan general rating na dai mababa sa 70.00 sa civil service examination, pwedisir matawanan nin dagdag na puntos, susog sa mga giya kan komisyon.
Ipapaotob an bagong polisiya poon sa August 9, 2026 Civil Service Examination.
Susog sa CSC, obheto kan lakdang na tawan nin pagbisto an dedikasyon, propesyunalismo, asin sakripisyo kan mga OFW, asin tawan sinda nin mas kadakol pang opurtunidad na makalaog sa serbisyo publiko bilang “Lingkod Bayani.”
Kabale sa mga kwalipikado an mga minasunod:
- Mga OFW sa presente, dating OFW, o planong magtrabaho sa ibang nacion.
- Mga OFW na igwang dai mababa sa limang taong overseas employment poon kan 2000 hasta sa presenteng taon.
- Mga OFW na nagkuwa nin civil service exam poon Agosto 9, 2026 asin nakakuwa nin dai bababa 70.00 an rating.
Pwedisir man na mag-apply an mga OFW na igwang ng kontrata alagad dai pa naghahale sa nacion.
Segun sa CSC, pwedisir mag-apply an mga kwalipikado sa arin man na klase nin trabaho, nacion, o lebel kan sahod sa abroad.
