LEGAZPI CITY-Piglinaw kan Department of Migrant Workers (DMW) na dae sinda mag-iimplementar nin deployment ban para sa Overseas Filipino Workers (OFWs) pasiring sa Saudi Arabia.
Kasunod ini kan pag-atake kan mga rebeldeng Houthi sa mga eropuerto sa Saudi Arabia.
Sinabi ni DMW Secretary Hans Leo Cacdac na sinda nakikipagkoordinar sa Department of Foreign Affairs (DFA) manungod sa seguridad asin political assessments sa lugar.
Inabisuhan man kaini an mga OFWs na pasiring sa Saudi Arabia na i-doble-check an detalyes kan saindang flight, huli ta dakol nang airline companies an nagkansela kan saindang flights.
Marurumdumang apat na Pilipino an nairido sa nasambitan na mga pag-atake sa airport; tulo an nagtetenir sa Intensive Care Unit (ICU), mantang an saro nakaluwas na sa ospital.
Pigsierto kaini na matao sinda nin asistensya sa mga pamilya kan mga biktima.
