LEGAZPI CITY-Labi sa 5,600 na mga tripulanteng Pilipino an nagtetenir na stranded sakay kan ginatos na mga commercial asin cruise vessels sa Persian Gulf asin Gulf of Oman huli sa padagos na pagkaantala kan maritime traffic.
Siring man huli sa mga banta sa seguridad na may relasyon sa nagdadakulang tensyon sa pag-ultanan kan Estados Unidos, Israel, asin Iran harani sa Strait of Hormuz.
Sa sarong pahayag, sinabi kan Department of Migrant Workers (DMW) na kabali an mga Pilipino sa pigkakarkulong 20,000 na international seafarers na apektado kan operational restrictions.
Segun sa ahensya, maabot sa 1,100 na mga tripulante an naibakwar hale sa Persian Gulf sa paagi nin koordinasyon kan mga operasyon na ginibo sa pakikipagtabangan sa ibang mga commercial vessels asin cruise ships.
Padagos an pag-monitor kan ahensya an mga barko na may lunad na mga Pilipino ngani masierto na igwa sinda nin supisyenteng pagkakan, inumong tubig, bulong, asin iba pang pangangaipo.
Ipigsugo man an mga lisensyadong manning agencies na regular na magtao nin update sa kondisyon kan mga seafarers asin siguraduhon na igwa sinda nin magkakanigong supply mantang nasa kadagatan.
Nakikipagkoordinar man an gobyerno sa mga foreign government, mga kagsadiri kan barko, asin iba pang mga stakeholders ngani mapadali an posibleng pag-uli kan mga Pilipinong tripulante.
Alagad, nagduduwa-duwa suboot an ibang mga ship owner na paluwason an saindang mga tripulante huli sa takot na ma-short-manned an mga barko durante kan byahe.
