LEGAZPI CITY-Pigbubusol ni Parañaque 2nd District Rep. Brian Yamsuan an propwestong halangkaw na sahod kan mga special needs education (SNed) teachers ngani matugunan an kakulangan sa mga paratukdo para sa mga estudyante na igwang kapansanan.
Sa irarom kan House Bill 5574, itataas poon sa Salary Grade 14 pasiring sa Grade 16 an minimum na salary grade kan special needs education teachers sa mga pampublikong eskwelahan.
Katumbas ini kan basic pay na P45,694 kada bulan ngonian na taon, asin P47,829 pagsapit kan 2027.
Segun kay Yamsuan, kaipuhan nin bastanteng numero kan special needs education teachers ngani matawanan nin pantay na na oportunidad sa edukasyon an mga estudyante na igwang kapansanan.
Basado sa datos, igwang 391,089 learners with disabilities (LWDs) na naka-enroll sa public schools kan school year 2024-2025, alagad wara pang 6,000 an special needs education teachers.
Nasa humigit-kumulang 600 bagong SNed teaching positions na ginibo kan Department of Education (DepEd) ngonian na taon alagad dai pa mapunan huli ta pighahalat pa an bagong qualification standards hale sa Civil Service Commission (CSC).
Nangapudan man an mambabatas sa CSC na pakaskason an proseso asin sa Kongreso na ipasa an propwestong dagdag-sahod ngani ma-enganyar asin mamantenir an mas dakol na SNed teachers sa mga pampublikong eskwelahan.
