LEGAZPI CITY-Kinumpirma kan Department of Education (DepEd) na empleyado kan DepEd Region 12 an ama kan Grade 9 student na imbuelto sa pambabadil sa Banga National High School sa Banga, South Cotabato.
Segun ki Education Secretary Sonny Angara, dae kaiba sa imbestigasyon kan DepEd an ama kan estudyante.
Sa ngonian, an empleyado nagtetenir sa aktibong serbisyo asin dae pa nasuspendir.
Sinabi kan DepEd na hahalaton ninda an resulta kan imbestigasyon kan Philippine National Police (PNP), partikularmente madapit sa isyu kan pagsasadiri nin badil.
Sinabi kan departamento na kun may makuang supisyenteng ebidensya, isasangat an magkakanigong kaso laban sa siisay man na mapatunayan na responsable.
Magigirumduman na sinabi kan alkalde kan Banga na an badil na ginamit, pagsasadiri kan ama kan estudyante asin itinatago sa sarong vault.
An estudyante suboot naglaog sa vault nganing kuanon an badil bago darahon sa eskwelahan.
Mientrastanto, sinabi ni Angara na hihilingon man kan DepEd an posibilidad na naimpluwensiyahan an estudyante kan inaapod na “true crime community.”
Mahagad man nin tabang an departamento sa Department of Information and Communications Technology (DICT) asin sa Department of the Interior and Local Government (DILG) para maimbestigahan an anggulo na ini.
Padagos na itinatao an psychological first aid asin mental health support sa mga estudyante, paratukdo, asin iba pang apektado.
Tulong estudyante an nagadan—kabali na an suspechado, na naghugot kan saiyang sadiring buhay makalihis an pambabadil—mantang nagkapirang iba pa an nairido sa insidente.
