LEGAZPI CITY-Nangapudan si Senate President Sherwin Gatchalian sa mga otoridad na siertuhon na ligtas asin areglado an pag-arestar ki Senator Ronald “Bato” Dela Rosa.
Sa sarong pahayag, pig duon ni Gatchalian an importansya kan pagsierto kan kaligtasan ni Dela Rosa asin kan mga nagpapaotob kan ley na naggigibo kan operasyon, na pignotar na an siring na mga aksyon kan pagpapaotob kan ley an natural na peligroso.
Tinawang-duon kaini na dapat na asikasohon nin tama an pag-arestar, orog na kasunod kan mga pahayag hale sa Department of the Interior and Local Government (DILG) na an operasyon posibleng magresulta sa violence.
Dati nang sinabi ni Interior Secretary Jonvic Remulla na maabot sa 10,000 katawo an pwedisir na magadan kun mangyari an sapiritan na pag-arestar ki Dela Rosa.
Segun pa ki Remulla, nasa negosasyon na ngonian an gobierno ngani na ma-engganyar an senador na magsuko na.
Sa ibong kaini, nanindugan si Gatchalian na kaipuhan na siertuhon man kan gobierno an saindang otoridad sa ibong kan mga naireport na igwang armadong grupo suboot na nagtatao nin proteksyon ki Dela Rosa.
Dati nang nagsabi ni Gatchalian na an gobierno dae dapat makipag-olay sa mga armadong grupo na wara nin awtorisasyon na magdara nin armas—orog na kun an siring na mga grupo an naturalesang kriminal o terorista.
Sinabi niya na an gobierno pwedesir magluwas na maluya kun ini makikipag-olay sa mga grupo na dapat na sakop kan pamamahala kan ley.
Sa ibong kaini, piglinaw kan Senate President na dae niya aram an bilog na detalye madapit sa grupo na suboot nagpoprotehir sa senador.
Nasasabutan man niya suboot kun tano ta tibaad itago kan mga otoridad an nagkapirang impormasyon huli sa mga konsiderasyon sa seguridad.
Magigirumduman na nag-anunsyo nin P50-million na pabuya an gobierno nganing makatabang sa pagdakop ki Dela Rosa, mantang tinawan siya nin sarong semana kan Philippine National Police ngani magsuko.
Si Dela Rosa napapaatubang sa mandamiento de aresto na ipinaluwas kan International Criminal Court (ICC), na igwang koneksyon sa suboot ‘crimes against humanity’ durante kan kampanya kontra droga kan dating administrasyon ni ex-President Rodrigo Roa Duterte.
Mientrastanto, sinabi ni Gatchalian na wara pa siyang naresibeng ano man na komunikasyon gikan ki Dela Rosa, kabali na an anuman na potensyal na kahagadan na isairarom sa kustodiya kan Senado.
An ultimo suboot nindang pakikipag-olay, iyo kan mag-atubang sa Senado an senador kan bulan nin Mayo.
