LEGAZPI CITY- Padagos an pag-iisip nin paagi kan grupo nin mga paratukdo ngani na maibsan an posibleng epekto kan super El Niño sa mga estudyante asin mga school personnel.
Segun ki Teachers Dignity Coalition Chairperson Benjo Basas sa intrevista kan Bombo Radyo Legazpi na bukas sa sainda an propuesto kan Department of Education (DepEd) na pagsusulog nin mas kumportable alagad disenteng bado kun matindi an init kan panahon.
Pigsasapinal man an desisyon kun magpapaotob nin adjustment sa oras kan klase.
Paliwanag kan opisyal na makakatabang man kun mas amay an oras kan klase ngani na dae maabutan kan kasagsagan kan init.
Katunayan, segun ki Basas na sa National Capital Region, sanay man an mga estudyante asin mga magurang na alas-6 an oras kan klase.
Mientras tanto, liwat man na tinawan duon kan nasabing opisyal na importante man liwat na magibo na mas mahewas an mga classrooms kun bako suksukan an mga estudyante sa laog kaini.
Mawot kaya na maibitaran an nakalihis na mga problema, kun sain nakakapagrehistro nin mga insidente na nawawaran malay an mga estudyante huli sa matinding init kan panahon.
