LEGAZPI CITY-Ikinaogma kan grupong Bicolana Gabriela an progreso sa kaso ni dating Presidente Rodrigo Duterte sa International Criminal Court (ICC) asin piglalaoman na makapag-atendir mismo si Duterte nin personal sa proceedings.
Segun ki Bicolana Gabriela Spokesperson Jen Nagrampa, sa intrevista kan Bombo Radyo Legazpi, na maogma an saindang grupo sa confirmation of charges kay Duterte, orog an may mga kaso sa Bicol na nagkawsa nin pagkakulong kan manlain-lain na lider kan mga progresibong grupo asin biktima kan extra judicial killings.
Welcome development man para sa sainda an pagusad kan kaso asin trial.
Dagdag pa ni Nagrampa, na kumpiyansa sinda na magpapadagos an kaso huli ta sa enot pa sana na hearing asin pag-presentar kan kaso, nailatag kan mga abogado an mga basehan kan kaso asin kan pagkaka-arestar kay Duterte.
Naglalaom man an grupo na sa paagi kan proseso kan ICC, matawan nin hustisya an mga nangyari asin an mga nagin biktima gera kontra droga.
Mientras tanto, magsasagibo man nin engagement asin makikipag-dayalogo an saindang grupo sa mga ahensya de gobierno sa Bicol ngani ipangapudan an aksyon orog na sa padagos na pagbayolar sa direchos humanos, red tagging, pananakot sa mga lider, asin an pagsasagibo nin rally kan mga progresibong grupo.
