LEGAZPI CITY-Posibleng labi sa kabanga kan mga miyembro kan Kamara de Representantes an maboto na pabor sa impeachment ni Vice President Sara Duterte, susog kay House Deputy Speaker Janette Garin.
Segun sa Kongresista, kun mangyayari ini, malagpas sa kinakaipuhan na 106 na boto kan Kamara ngani maipasar an impeachment complaint sa Senado para sa paglilitis.
Sinabi rin ni Garin na sa irarom kan Lakas-CMD, igwang labi sa 80 miyembro kan Kamara, na posibleng 2/3 an masuporta sa impeachment, basado sa ebidensyang inilatag sa mga pagdangog.
Sa ibong kaini, pigduon niya na igwang nagkapirang mga mambabatas na posibleng maimpluwensiyahan kan politika asin sirkumstansya kan saindang distrito, orog na sa Mindanao.
Tinawan duon man ni Garin na dae magkakaigwa nin single party stand an Lakas-CMD asin tutugutan an mga miembros kaini na magboto susog sa saindang konsensya.
Mientrastanto, sinabi man ni Bicol Saro Party-list Rep. Terry Ridon na piglalaoman niyang labi sa kabanga kan mga representante kan party-list an masuporta sa impeachment complaint.
Sa ibong na lado, nanindugan si Davao City 1st District Rep. Paolo Duterte na dae dapat impluwensiyahan kan pressure an boto kan mga mambabatas, sa tahaw kan mga alegasyon na piggagamit suboot an budget asin Statements of Assets, Liabilities and Net Worth (SALN) ngani impluwensiyahan an pag-boto.
Pinahimutikan ini kan nagkapirang kongresista asin inagyat an kampo kan Bise Presidente na mag-atubang sa Kamara para sa deliberasyon.
Padagos an paghalat kan House Committee on Justice sa pagkumpleto kan committee report asin articles of impeachment, na pag-uulayan bago isumitir sa plenaryo.
Mientras tanto, nakatalaan na mag-boto an Kamara sa committee report sa maabot na Mayo 11, 2026.
