LEGAZPI CITY — Haros magkakasunod na lava fountaining events asin pagbulos kan lava an padagos na naoobserbaran sa bulkang Mayon sa mga nakalihis na aldaw asin oras.
Susog sa latest data kan Philippine Institute of Volcanology and Seismology (PHIVOLCS), nairehistro an nasa 78 successive lava fountaining episodes sa bilog na magdamlag mantang nag-abot man sa 152 sa kabilugan puon kan maagahon kan Lunes.
Nagdudurar an mga nasabing episodes sa laog nin tolo hasta 41 minuto mantang dangog man an mga dagundong o rumbling sounds dawa sa distansyang 10 kilometros sa nasabing bulkan.
Tipikal man na puting aso an nagluluwas hale sa crater o pig-aapod na ‘steam-laden plumes’ na may langkaw na hasta 2.5 kilometers na pasiring sa sirangan-norte sirangan an direksyon.
Labi man sa apat na kilometro an inabot kan deposito kan pyroclastic density currents o PDCs sa Miisi, Bonga asin Basud Gullies na posibleng magcausa nin pagbulos kan lahar sakaling en caso magkaigwa nin pag-uran.
Kabilugan na 83 volcanic earthquakes man an nairehistro mantang nagtetenir sa above normal volume an pagbuga kan asupre na nasukol sa 1,885 na tonelada sa laog nin sarong aldaw.
Magigirumduman na enot nang ipighayag ni PHIVOLCS Dir. Renato Solidum na nairehistro ngonian na semana an ‘most energetic seismic monitoring record’ huli sa dagos-dagos na paghiro kan bulkan huli sa pagsakat kan magma.
