LEGAZPI CITY-Nairehistro an halangkaw na aktibidad kan Bulkang Mayon sa nakalihis na magdamlag susog sa datos kan Philippine Institute of Volcanology and Seismology (Phivolcs).
Nagtetenir sa Alert Level 3 an Bulkan asin padagos an pagdaloy kan lava sa may Basud gully na nasa 3.8 km, sa Bonga gully na nasa 3.2 km, asin sa Mi-isi na nasa 1.6 km na sana.
Nagkakaigwa man liwat nin panaka-naka asin maluluyang strombolian activity, siring man an mga pagbuga kaini nin mga volcanic materials.
Nasa 23 volcanic earthquakes kaiba an 15 volcanic tremors, 351 Rockfall asin 5 pyroclastic density current signals o uson an nairekord sa Bulkan.
Mientras tanto nasa 908 tonelada an nairehistrong Sulfur Dioxide Flux hale digdi.
Huli digdi, padagos an patanid kan Phivolcs asin iba pang ahensya na likayan an paglaog sa 6km permanent danger zone asin magin alerto sa posibleng huma kan ashfall.
