LEGAZPI CITY – Isinagibo kasubagong aga kan Police Regional Office 5 an send off ceremony para sa deployment kan labi 1,500 personnel hale sa manlain-laing unit para sa Peñafrancia Festival sa Naga City.
Segun ki PRO5 Regional Director Police Brigadier General Nestor Babagay Jr. sa intrevista kan Bombo Radyo Legazpi na preparado na sinda para sa pagtatao nin dagdag na seguridad sa nasabing aktibidad.
Simple sana suboot an iwinalat niyang direktiba asin iyo ini an protektaran an mga deboto asin turista na makikisumaro sa enterong durasyon kan festival asin dae magduwa-duwang arestaron an siisay man na magibo nin krimen sa lugar.
Bako sana ini mapadapit sa Philippine Nationa Police kundi sa pagtatarabangan ninda kan Office of Civil Defense, Armed Forces of the Philippines, Bureau of Fire Protection, Philippine Coast Guard asin kan lokal na gobierno para sa pagpapa-otob kan pazy orden sa lugar.
Piglalaoman man kan opisyal na maabot sa haros 2 million na katawo an makikisumaro sa Peñafrancia Festival kun kaya pighahandaan na ninda an siring kaining mga bagay.
Kun kaipuhan suboot nin police assistance, magdial sana nin 911 sa saindong mga cellphone asin syertong may pulis na marani saindo.
Hagad man ni Babagay an kooperasyon kan mga deboto nganing mapugo an ano man na klase nin kriminalidad na mangyayari sa enterong durasyon kan aktibidad.
