LEGAZPI CITY—Takdag sa kamot kan mga otoridad an duwang indibidwal makalihis an ikinundusir na anti-illegal drug operation kan Legazpi City Police Station asin Philippine Drug Enforcement Agency (PDEA)-Albay Provincial Office sa Purok-1, Barangay 58-Buraguis, Legazpi City.
Binisto an mga suspek na sinda alyas “Roy”, 42-anyos, asin alyas Ric”, 46-anyos na parehong residente kan nasabing ciudad.
Basado sa report, nakabakal an poseur buyer hale sa pangenot na suspek nin sarong pakete nin pigtutubudang shabu.
Narekober man sa body search an kadugangang mga pakete nin pigtutubudang shabu, buy-bust money, asin pirang drug paraphernalia siring kan improvised aluminum tooter, aluminum foil na may pigtutubudang drug residue, mga lighter, asin gunting.
Naaktuhan man si alyas “Ric” na naggagamit suboot nin ilegal na droga sa tahaw kan operasyon.
Pigkarkulong nasa P11,560 an standard drug price kan nakumpiskar na pigtutubudang shabu gikan sa mga suspek.
Nahahampang an mga nasabing indibidwal sa pagbayolar sa Republic Act 9165 o Comprehensive Dangerous Drugs Act of 2002.
