LEGAZPI CITY—Sarong 14-anyos na lalaki an naipit makalihis na buminangga an sarong truck sa poste sa Purok 5, Brgy. Sipi, Daraga, Albay kan nakalihis na aldaw.
Segun ki Richard Arimado, an ama kan biktima, sa intrevista kan Bombo Radyo Legazpi, naglalakaw an saindang aki sa may tinampo huli ta pigsugo ninda ini na magbakal sa tindahan, alagad kan may nadangog sindang tanog nin gari suboot na nabangga tulos na nindang hinanap an biktima.
Dugang kaini na kan sainda nang pighanap an aki, nagsuriyaw ini na yaon siya sa pinangyarihan kan insidente asin nahiling na naipit na an biktima.
Nahaloy man suboot an pagresponde sa aki huli ta naipit ini kan poste asin rida kan trak.
Sa presente, na-rescue na an biktima asin tulos na dinara sa ospital, mantang an drayber dae man nairido.
Mensahe man kan ama sa nakabangga na simbagon an gastos sa pagpapabulong kan saiyang aki.
Mientrastanto, susog sa mga nakahiling na posibleng nawaran nin preno an trak asin nabangga man kaini an limang traysikel asin sarong kotse man an nakasabay.
Dugang digdi, narunot an saro sa mga traysikel na nakaparada, mantang nagsuprir nin lastro an ibang drayber kan mga nasambitang traysikel.
Padagos man an imbestigasyon kan mga otoridad sa naunambitang aksidente.
