LEGAZPI CITY- Viral sa ngunyan sa social media an video kan sarong pulis sa Sorsogon na nagtabang sa pangangaki kan sarong babaye sa laog kan traysikel.
Sa intrevista kan Bombo Radyo Legazpi sa viral na pulis na si Pol. Starff Sgt. Gadwhin Lladones, papasiring na kuta sa Sorsogon Provincial Hospital lunad nin traysikel an ina na nabisto sana sa pangaran na Bandola, kan makamati ining mangangaki na.
Huli digdi, naghagad na nin tabang sa Sorsogon City Police Station an agom kan babaye kung kaya tulos man na nagresponde si Lladones asin iba pang pulis.
Mismong sa traysikel na isinagibo an pagpapangaki sa ina na naghaloy man nin nagkapirang minuto hasta sa mailuwas na an sarong mabaskog na umboy na lalaki.
Segun kay Lladones, naggamit siya nin paper clip asin kutsilyo na pigsanitize para sa umbilical cord kan umboy saka na idinalagan an mag-ina pasiring sa ospital.
Napag-araman na dati man na nagtatrabaho bilang nurse si Lladones kung kaya may aram na ini sa pagpapangaki.
Sa ngunyan, may rinibong views na an nasabing video na padagos pang nakakaguno nin mga positibong komento hali sa mga netizens.
