LEGAZPI CITY—Takdag sa kamot kan mga otoridad an sarong high value individual sa ginibong buy-bust operation sa banwaan kan Irosin, Sorsogon.
Naarestar si alyas “Joker,” 31-anyos, makalihis magpabakal nin pigtutubudang shabu sa sarong police poseur buyer.
Nakumpiskar sa suspek an limang pakete nin pigtutubudang shabu na may gabat na 8.94 gramos asin may standard drug price na P60,792.
Afuera digdi, narekober man saiya an buy-bust money, cellphone, lighter, folded paper na piggamit bilang bugtakan kan droga, sarong barya, asin motorsiklong pigggamit suboot sa transaksyon.
Basado sa report, naarestar ini sa pinagsarong operatiba kan Special Operations Unit 5 Philippine National Police – Drug Enforcement Group, Irosin Municipal Police Station, Philippine Drug Enforcement Agency Office Sorsogon, asin Provincial Drug Enforcement Unit Sorsogon.
Nakatalaang isumiter sa Sorsogon Provincial Forensic Unit an nakuang drug evidence para sa laboratory examination mantang an mga non-drug evidence an nasa kustodiya kan SOU5 PNP-DEG.
Padagos man an pinahigot na kampanya kan kapulisan kan Sorsogon kontra sa ilegal na droga nganing mamantinir an kaligtasan sa provincia.
