LEGAZPI CITY- Labi an kaugmahan kan sarong personahe kan Rapu-Rapu Municipal Police makalihis an matrayumpong pagsalbar kaini sa sarong umboy na ipinangaki sa bangka.
Segun ki Police Corporal Deanna Quierra sa intrevista kan Bombo Radyo Legazpi na nakaresibe sinda nin apod dapit sa sarong babayi na mangangaki na mantang lunad kan bangka kaya tulos sindang nagpasiring sa pantalan.
Pag-istorya kan opisyal na pag-abot sa lugar, yaon na man an mga tauhan kan Bureau of Fire Protection kun sain nahiling ninda na nakaluwas na an umboy asin nangingitom na ini.
Bilang sarong nurse asin pulis, marikas na nagdesisyon an opisyal na magsagibo nin Cardiopulmonary resuscitation ngani na ma-revive an nasabing umboy.
Dakula man an pasasalamat ni Quierra na nagin dalan siya ngani na mabuhay an umboy hasta sa dagos ining maidalagan sa ospital kaibanan an ina.
