LEGAZPI CITY – Nakipag-coordinar na an Municipal Disaster Risk Reduction and Management Council kan San Pascual, Masbate sa provincia kan Romblon makalihis an pagkaka-rescue sa sarong parasira sa kasagsagan kan raot kan panahon huli sa Bagyong Hanna.
Binisto an parasirang si Vernald Monte, 29-anyos na nagtetenir ngonian sa kustodiya kan Brgy. Mabuhay kun sain ini nahiling.
Sa intrevista kan Bombo Radyo Legazpi ki San Pascual MDRRMO head Victor Patropez, nasa maray namang kamugtakan an parasira na napadpad sa Burias Island makalihis na magkaigwa nin technical problem an bangka.
Dinara naman ini kan makusog na ukol kan kadagatan sa Masbate mantang nahiling man kan mga kapwa parasira kan nasabing provincia.
Napag-aramang 12 oras pa ining nagpapataw-pataw lunad kan bangka sa kadagatan.
Sa presente, pighahalat na sana an pagrahay kan kamugtakan kan mga kadagatan asin pagbaba kan nakabanderang gale warning tangarig na makabalik na si Monte sa nawalat na pamilya sa Romblon.
