LEGAZPI CITY-Naghahanda na an mga local muslim community para sa selebrasyon kan Eid’l Adha o Feast of Sacrifice.
Segun kay Bicol Muslim President Al Amin Hassan, sa intrevista kan Bombo Radyo Legazpi na popoonan ninda an aldaw sa paagi kan pangadyi pasado alas 7 nin aga asin bago mag-udto, makatay nin kambing asin magkakaigwa nin salu-salo an kada pamilya.
Pigsasagibo an pagkakatay tuyong Eid’l Adha bilang pagrumdom sa aldaw kan pag-sakripisyo kuta kan propeta na si Abraham sa saiyang aki na si Ismail.
Kun kaya pagsapit kan bulan na ini, magkakatay asin mag-aalay nin kambing asin ipapanao kan mga mayayamang pamilya sa mga nangangaipohan.
Kadalasan na sa simbahan pigseselebar kan mga muslim an Eid’l Adha asin nagkakaigwa nin mga miting o pag-oolay.
Makalihis ini, nagkakaigwa man sinda nin salu-salo sa mga resort o maski sain depende sa kada pamilya kaiba an bilog na kamag-anak.
Sa kabilugan, nasa 20,000 na indibidwal sa Bicol Region an makikisabay sa nabanggit na selebrasyon.
