LEGAZPI CITY-Piglalaoman kan grupo nin mga parasisira an igwang mas mahiwas na eksperyensya asin bako imbuelto sa kurapsyon na Senate President enkaso magpalit nin liwat nin liderato.
Segun kay PAMALAKAYA Chairperson Pando Hicap, sa intrevista kan Bombo Radyo Legazpi na matino naman si Senator Win Gatchalian asin nahilingan man ninda nin pagpupursige na magapampanan an tungkulin bilang senador.
Alagad para sainda, dapat mas igwang mahiwas na eksperyensya asin napatunayan na bako imbuelto sa anumang anomalya orog na sa isyu kan kurapsyon.
Sinabi pa ni Hicap na dakulang kawaran si dating Senate President Tito Sotto huli ta neutral ini asin warang pigkakampihan kundi ginagampanan an pamumuno na magin maayos asin organisado an daloy kan hearing kan Senado sa kada komite.
Para sa grupo, importante suboot na igwang paninimbagan an sarong Senate President para sa kapakanan kan mayorya kan mga populasyon.
Mientrastanto, wara man suboot na nahihiling an grupo kay Senator Pia Cayetano bilang haloy na ining Senador asin para sa sainda wara suboot ining disenteng opinyon katakod kan mga problema asin suliranin orog na sa sektor kan mga parasisira.
Sinabi man ni Hicap na bako katanggap tanggap si Senator Pia na magin Senate President asin dai ninda ini pinaglalaoman.
