LEGAZPI CITY—Katakod kan pag-obserbar kan World Oceans Day kan Hunyo 8, nagkundusir nin hiro-protesta an Pambansang Lakas ng Kilusang Mamamalakaya ng Pilipinas sa C4 Centennial Park sa Navotas nganing kontrahon an nagpapadagos na reklamasyon sa Manila Bay.
Segun ki PAMALAKAYA Spokesperson Salvador France, sa intrevista kan Bombo Radyo Legazpi, pangapodan ninda na irespeto an inanusyar ni Presidente Ferdinand Marcos Jr. kan 2023 na dagos nang ikanselar an gabos na reklamasyon sa nacion reklamasyon sa nacion partukularmente sa Manila Bay
Huli kaya kan nasabing lakdang apektado an mga parasisira urog na naraot na an pangisdaan bako sana sa Metro Manila kundi magin sa gabos na rehiyon sa nacion.
Dugang niya na pwedesir man na makaapektar an padagos na reklamasyon sa pagbabaha sa pirang lugar sa parte kan Manila Bay, Bataan magin sa Bulacan urog na ngunyan na mapuon na liwat an panahon kan tag-uran.
Mientrastanto, en koneksyon man sa pagselebrar kan Araw ng Kalayaan kan Hunyo 12 pangapodan man ni France sa namamanwaan na dapat magkasararo asin i-agrangay na bako malaya an Pilpinas, asin ipadagos na ipaglaban an tunay na reporma sa kadagaan asin pangisdaan huli sa ini an solusyon sa katiosan sa nacion urog na sa paraooma asin parasisira.
