LEGAZPI CITY—Posibleng pinagplanuhan suboot kan mga suspek an pambabadil sa Indian national na binawian nin buhay sa Guinobatan Public Market sa banwaan an Guinobatan Albay.
Magigiromdomang idineklarang dead on arrival an nasabing indibidwal, mantang presenteng nagpaparahay sa ospital an sarong paratienda nin buko na tinamaan nin ligaw na bala.
Segun ki Guinobatan Municipal Police Station Chief of Police Police Lieutenant Colonel Joseph Imperial, sa intrevista kan Bombo Radyo Legazpi, basado sa saindang inisyal na imbestigasyon na nahilingan ninda na imbuelto sa lending scheme an Indian national kun sain may narekober sindang mga records kan saiyang mga pautang sa mga paratienda na saiyang pigsisingil durante kan nasabing aldaw.
Segun sa opisyal na caliber .45 an ginamit sa pambabadil kan suspek.
Napag-araman man ninda na bako suboot residente kan Guinobatan an look out na indibidwal sa insidente.
Pighayag man kan opisyal na dati nang may mga naka-deploy asin nagpa-patrol na kapulisan sa lugar alagad durante kan nasabing insidente an yaon sa ibong na pwesto an saindang personahes mantang nagin advantage man suboot ini kan gunman, huli sa pigsusundan naman kan mga ini an target na Indian national.
Sa presente wara pa sindang impormasyon sa profile kan gunman alagad igwa na sindang sketch kan mga ini na pwedesir maisapubliko sa mga masunod na semana.
Mientrastanto, pangapudan man ni Imperial sa publiko na pwedesir saindang i-report an anumang impormasyong makakatabang sa pagresolbar kan nasambitang insidente.
