LEGAZPI CITY-Pigpapasalamat kan Schools Division Office of Albay, an maayos na pagtatapos kan Palarong Panlalawigan 2026 sa katahawan kan pag-alburuto kan Bulkang Mayon.
Segun kay Schools Division Office of Albay Spokesperson Froilan Tena sa intrevista kan Bombo Radyo Legazpi na wara man nin nairehistrong anumang insidente asin nagin maayos an dalagan kan Palaro ngonian na taon.
Nagpapasalamat man an opisyal huli sa nakisama an magayon na panahon asin an Bulkang Mayon sa pagsasagibo kan aktibidad poon Enero 26 hasta Enero 30.
An Palarong Panlalawigan ngonian na taon, binanga sa anom na cluster sa elementary asin secondary level kada school district asin munisipalidad.
Pigtanghal man bilang gana sa elementary level ang cluster A suminunod bilang runner up an cluster B asin cluster C.
Sa secondary level, pigtanghal bilang gana ang cluster 2 kun sain sinundan kan cluster 1 asin cluster 3.
Popoonan na man sa Lunes, Pebrero 2, an intensive training kan mga gold medalist na isasabak para Palarong Bicol.
Mientrastanto, nagsasagibo na nin contingency plan an ahensya katuwang an Disaster Risk Reduction and Management Office bilang paghahanda sa Palarong Bicol huli sa posibleng peligro kan padagos na pagalburuto kan Bulkang Mayon asin posibleng mga kalamidad sa rehiyon.
