LEGAZPI CITY-Padagos an gera sa Southern Lebanon maski pa inako na kan Israel asin Hezbollah an planong tigil-putukan na propwesto kan Estados Unidos.
Segun kay US President Donald Trump, nagkasundo an parehong kampo na punduhon na an gera makalihis na maka-olay an saindang mga kinatawan.
Tinanggap man suboot kan Hezbollah an kasunduan na punduhon na an pag-atake sa Israel kapalit kan dai pag-atake kan Israel sa Beirut.
Kinumpirma ni Israeli Prime Minister Benjamin Netanyahu an kasunduan alagad nagpatanid na magpapadagos an pag-atake kun dai mapundo an Hezbollah sa pag-target sa mga ciudad asin sibilyan kan Israel.
Sa ibong kaini, sinabi kan Hezbollah na nagsagibo ini nin mga pag-atake gamit an drone asin artillery laban sa mga militar kan Israel, mantang nairehistro man kan Israel na naharang kaini an duwang projectile hale sa Lebanon.
Igwa man na panibagong airstrike kan Israel sa southern Lebanon.
Huli digdi, nagpatanid man an Iran na an anumang pagbalgar sa tigil-putukan sa Lebanon, maikokonsiderang pagbalgar sa nag-iiral na kasunduan sa pagultanan kan Iran asin Estados Unidos.
Mientras tanto, nanindugan man si Trump na nagpapadagos an dimplomasya asin nagtetenir na epektibo an kasunduan sa ceasefire.
