LEGAZPI CITY-Nagrapado na sa P248 milyon an kantidad kan mga kwartang narekober kan gobierno hale sa mga nagako na nakaresibe nin kickbacks hale sa maanomaliyang flood control projects.
Kabale digdi an P7 milyon na laog kan bank account ni dating DPWH Undersectary Roberto Bernardo na saiyang ibinalik kan Nobiyembre alagad presente ining naka-freeze kasunod kan kahagadan Anti-Money Laundering Council (AMLC).
Marurumduman na nadawit an pangaran ni Bernardo bilang nagtao suboot kan mga komisyon sa mga kampo ni Sen. Jinggoy Estrada, Joel Villanueva, ex-Sen. Bong Revilla, ex-Ako Bicol Party List Rep. Elizaldy Co asin dating Caloocan Rep. Mitch Cajayon hale sa flood control projects.
Saro man suboot si Bernardo sa nag-request kan nasa 25% na kickbacks.
Ibinalik man ni dating Bulacan district engineer Henry Alcantara an P110 milyon asin P71 milyon sa Department of Justice, bilang parte kan saiyang promisa na pagbabalik kwartang saiyang naresibe bilang kickback sa saiyang aplikasyon para magin state witness.
Mientrastanto, ngonian na Disyembre man, ibinalik ni dating DPWH-NCR regional director Gerald Opulencia an labi sa P40 million sa DOJ, bilang parte man kan saiyang commitment na ibalik an kabilugang P150 milyon na inamin niyang nakuwa hale sa pondo para sa mga proyekto sa Metro Manila kan siya nagtutukaw bilang director.
