LEGAZPI CITY-Sinabi kan kampo ni Vice President Sara Duterte na nagpahiling suboot nin kakulangan sa ebidensya an nagin presentasyon sa pagdangog kan House Committee on Justice katakod kan mga alegasyon na inciting to sedition asin grave threats laban sa Bise.
Sa pahayag ni Atty. Paul Lawrence Lim kan Chua Lim & Associates, an Counsel ni Vice President Duterte sa NBI Complaint, na pinili, pig-edit, asin kulang sa konteksto an mga ebidensyang ipinaluwas.
Dagdag pa kan abogado, napalitan suboot kan opinyon an mga katotohanan asin igwang mga konklusyong basado sana sa hula, asin bako suboot bastante ngani makabilog nin probable cause o maski prima facie case
Dagdag pa niya, an pagporbar na i-konekta an Bise Presidente sa suboot mga pahayag ni President Marcos, nangangaipohan suboot nin “gigantic leap in logic” asin pagbayolar sa mga basic evidentiary principles.
Sinabi pa ni Lim na an mga pagdangog, gari sarong “fishing expedition” sana na obheto sana suboot na magtao nin paagi sa depektibong mga reklamo kan impeachment.
Makalihis an pagdangog, sinabi pa kan kampo ni VP Sara na an orolay dapat na dangugon sa tamang hukuman, kun saen laoman na mananaig an ebidensya asin igagalang an nag-iiral na ley.
Marurumduman na kasuhapon, nakaguno nin 53–0 na boto hale sa mga miyembro ng komite, na nagsasabing igwang probable cause sa mga reklamong impeachment laban kay VP Sara.
Kabale digdi an mga reklamo kan suboot maling paggamit kan P612.5 milyon confidential funds kan Office of the Vice President asin Department of Education, pati na an P6.7 bilyon bank transactions na nai-report kan Anti-Money Laundering Council (AMLC).
Kairiba man sa reklamo an suboot banta ni VP Sara laban kay President Ferdinand Marcos Jr., First Lady Liza Araneta Marcos, asin kay dating House Speaker Martin Romualdez.
