LEGAZPI CITY-Piglalaoman na maboboto an House Justice Committee kun igwa nin bastanteng “probable cause” para sa impeachment ni Bise Presidente Sara Duterte ngonian na aldaw nin Miyerkules, Abril 29.
Segun ki House Justice Committee Chairperson asin 2nd District Batangas Rep. Gerville Luistro, igwa nin nagkapirang importanteng isyu na dapat pag-olayan bago an pagboto, kabali na an income tax returns ni VP Sara Duterte asin kan saiyang agom na si Atty. Manases Carpio, siring man an suboot banta kan Bise Presidente laban ki Presidente Ferdinand Marcos Jr.
Saro sa mga nakatalaan na isyu, iyo an diskusyon kan isinumiteng green box na isinumiter kan Bureau of Internal Revenue (BIR), huli sa pagirumdom kan ahensya na dae ini pwedeng buksan sa open session asin dapat pag-olayan sana sa closed-door meeting kun ini sarong “In aid of legislation”.
Mientrastanto, nagluwas man sa hearing an report kan Anti-Money Laundering Council (AMLC) kun sain nagsasabing igwang kabilugang P6.7 billion an soboot sakop asin kaduda-dudang transaksyon sa pangaran ni VP Sara asin Carpio.
Enot nang pinahimutikan kan kampo kan Bise Presidente an report, na nagsasabi na “bloated” an mga figures huli ta pinagsararo suboot an mga transaksyon sa laog nin nagkapirang taon.
Segun sa Office of the Ombudsman, dae nagdeklarar nin anuman na cash on hand o deposito sa bangko si Sara Duterte sa saiyang Statement of Assets, Liabilities and Net Worth (SALN) poon 2019 hasta 2024.
Nagkapirang miembros kan komite an nagsabi na susuportahan nind an pagkakaigwa nin probable cause, mantang piglalaoman na kun ini maaprobaran, ipagpapadagos pa an report kan komite antes na isumiter sa plenaryo.
