LEGAZPI CITY – Karsel an bagsak kan sarong pigkokonsiderang high-value individual sa isinagibong buy-bust operation kan mga otoridad sa Barangay Basud, Sorsogon City.
Segun ki Sorsogon City Police Station Chief of Police, Police Lieutenant Colonel Christopher Aduviso sa intrevista kan Bombo Radyo Legazpi na binisto an suspetsado na si alyas “Junior,” 24 anyos, na nadakop ninda sa pagtatarabangan kan Sorsogon City Police Station, Special Operations Unit 5 kan PNP Drug Enforcement Group asin Philippine Drug Enforcement Agency Sorsogon Provincial Office.
Nakuwa sa pagsasadiri kan suspetsado an siyam na heat-sealed transparent plastic sachets na may laog kan pigtutubudang shabu na may gabat nin poco mas o menos 35 gramos na may pigkakarkulong standard drug price na maabot sa P238,000.
Piglinaw niya man na bago isakatupadan an operasyon an haloy nindang pigmanmanan an suspetsado kun sain napag-araman nindang dati na palan ining nakulong huli sa parehong gawi.
Pigtaram pa kan opisyal na an suspetsado an nagpapabakal man sa manlain-laing lugar kan provincia kun kaya dakulang bagay para sainda an pagkakadakop ninda digdi.
Sa presente, nagtetenir na suboot sa kostudiya kan Sorsogon City Police Station an suspetsado asin mahahampang sa pagbayolar sa Republic Act 9165 o an Comprehensive Dangerous Drugs Act of 2002.
Mientrastanto, puga puga man an saindang piggigibong lakdang nganing mamantenir an pagigin drug cleared city kan Sorsogon City huli ta dae natatapos an saindang kampanya laban sa ilegal na droga maski naideklara na an saindang lugar na drug cleared.
Pangapodan ni Aduviso sa publiko na dae magduwang isip na magdulok sa mga kapulisan an mga manlain-laing klase nin krimen na nangyari sa saindang luhgar nganing tulos ining matawan nin magkakanigong aksyon.
