LEGAZPI CITY – Karsel an bagsak kan pigkokonsiderang no.1 Municipal most wanted person kan Prieto-Diaz, Sorsogon para sa kasong panlulugos.
Segun ki Prieto-Diaz Municipal Police Station Women and Children’s Protection Desk Assistant Police Corporal Vanessa Bolima sa intrevista kan Bombo Radyo Legazpi na binisto an suspetsado na si alyas “Nicko”, 27 anyos, may ka-live-in-partner asin nagtatarabaho bilang construction worker.
Basado sa saindang inisyal na imbestigasyon, nasa edad 18 anyos an biktima kan panahong mangyari an panlulugos asin parehong naka-istar kaiba an suspetsado sa sarong harong.
Susog suboot sa salaysay kan biktima, kada nasa impluwensya nin arak an suspetsado an nagpoporbar siyang luguson mantang huli man sa takot kun kaya ngonian sana nakasumbong asin nakahagad nin tabang.
Pigtaram pa kan opisyal na kan nagsumbong sainda an biktima, tulos sindang nagsunad nin kaso asin nagsagibo nin intervention sa harong kaini nganing masabotan kan mga miyembro kan saiyang pamilya sa nangyari saiya.
Makalihis madakop huli sa bisa kan mandamiento de aresto, padagos man giraray sa pagnigar kan suspek mapadapit sa kasong pigkakahampang niya asin sinabing buyong suboot ini kan mangyari an insidente.
Abiso niya sa publiko na permihang mag-ingat an gabos laban sa mga mapagsamantala asin mapang-abusong indibidwal asin dae matakot magsumbong sa otoridad enkaso maka-eksperyensya nin kapareho kaining insidente nganing tulos matawan nin aksyon.
Pighayag pa ni Bolima na nagtetenir an suspetsado sa kustodiya kan Prieto-Diaz MPS para sa magkakanigong dokumentasyon asin disposisyon.
